Публикации » Каникул усăллă ирттĕр

Çуллахи вăхăтра çула çитмен ачасене вăхăтлăх ĕçе вырнаçтарни йăлана кĕчĕ пулĕ. Çакă усăсăр çÿрекен çамрăксем хушшинче йĕрке пăсакансен шутне чакарма чылай пулăшать, вĕсене пĕчĕкрен çынпа хутшăнма, коллективра ĕçлеме те вĕрентет. †çленĕшĕн укçине нумаях тÿлемесен те, шăпăрлансем тăрăшсах вăй хума хатĕр. Çавăнпа та районти халăха ĕçпе тивĕçтерекен центр ачасене кану вăхăтĕнче тĕрлĕ çĕрте ĕçлеме май парать.

Çу уйăхĕн вĕçенче «†çсен ярмаркки» пулса иртнĕччĕ. Çавăнта тĕрлĕ предприятисемпе организацисен пуçлăхĕсемпе представителĕсем çула çитмен ачасене вăхăтлăх ĕçе илме пултарассине палăртса хăварнăччĕ.

Халĕ хăш-пĕр хутлăхсенче (уйрăмах Карапаш, Шуршăл, Шĕнерпуç) шкул ачисем ĕçлеççĕ те ĕнтĕ. Çавăнти ачасем нимĕнле ĕçрен те хăраса тăмаççĕ, картасене сăрлаççĕ, урамсене типтерлĕ тытаççĕ, чечексем ÿстереççĕ, ветерансемпе Аслă Отечествăлла вăрçа хутшăннă ватăсем çинчен те манмаççĕ вĕсем, шыв йăтмалла-и, çум çумламалла-и – яланах хатĕр пулăшма. Урхас Кушкă шкулĕнче, 28-мĕш, 11-мĕш училищăсенче вĕренекенсем тавралăхра тирпей-илем кĕртес ĕçре вăй хураççĕ. Çăкăр пĕçерекен комбинатра тăрăшакансене те шкул ачисем пулăшаççĕ, вĕсенчен опыт илеççĕ. Райадминистрацин культурăпа социаллă аталану уйрăмне те хĕрача вăхăтлăх ĕçлеме вырнаçнă. Вăл кунта экскурсисем, тĕрлĕ мероприятисем йĕркеленĕ тата ирттернĕ çĕре хутшăнать.

Хаçат редакцийĕ те ыттисенчен уйрăлса юлас темерĕ. Икĕ çамрăк корреспондент пĕр уйăхлăх вырнаçрĕç кунта ĕçлеме. Вĕсем статьясем çыраççĕ, корректор ĕçĕсене те пурнăçлаççĕ, верстка тума та вĕренеççĕ. «Редакцинче ĕçлеме питĕ интереслĕ, час-часах çĕнĕ çынсемпе паллашни хавхалантарать» – теççĕ çамрăксем.

Каникул вăхăчĕ нумаях та юлмарĕ ĕнтĕ. Анчах та эсир, 14–18 çулхи ачасем, ĕçсĕр аптăраса çитрĕр пулсан, ял хутлăхĕн администрацине кайса хăвăрăн ĕçлес килни çинчен кăмăл пуррине калама пултаратăр.

И. ФЕДОРОВА.