Публикации » Хыçа юлчĕç шкул çулĕсем

Сĕнтĕрвăрри хулинчи Культура лапамĕ шкул вĕренсе пĕтерекенсене уяв каçне йыхравларĕ. Кунта районти пур шкулсенчен те тенĕ пекех килсе çитрĕç. Уяв программине Т. Кочетковапа С. Касьянов ертсе пычĕç. Шкул саккипе сывпуллашакансене райадминистраци ятĕнчен район пуçлăхĕн пĕрремĕш çумĕ Ю. Челейкин саламларĕ, хастар çамрăксене грамотăсемпе чысларĕ. Районти вĕрентÿпе çамрăксен политикин пайĕн ертÿçи Л. Смирнова ылтăн тата кĕмĕл медальсем илме тивĕç пулнисем çинчен калакан хушуна вуласа пачĕ, унтан медалистсене пĕрин хыççăн теприне сцена çине йыхравларĕ.

Уяв каçĕн чи хĕрÿллĕ саманчĕ – балăн королĕпе королевине суйласси пулчĕ. Ташласа, юрласа, сăвă каласа тупăшнă хыççăн çак ятсене Шуршăл шкулне вĕренсе пĕтернĕ А.Тихоновпа А. Салмина çĕнсе илчĕç. Уяв каçĕ уçă сывлăшри дискотекăпа вĕçленчĕ.

Е. ИВАНОВА .