01 марта 2021 г.
Нарăс уйăхĕн 24-мĕшĕнче Правительство çуртĕнче Чăваш Республикин Министрсен Кабинечĕн черетлĕ ларăвĕ иртнĕ. Унта темиçе йышăнăва пăхса тухнă, вĕсенчен хăшĕпĕрисем индексаципе çыхăннă.
Сăмахран, ялта ĕçлекен специалистсене коммуналлă пулăшу ĕçĕсемшĕн тÿлемелли тăкаксен кашни уйăхри компенсацийĕн виçине ÿстересси çинчен йышăну тунă.
Индексаци виçи 3,4 процент пулать. Чăваш Республикин ĕçпе социаллă хÿтлĕх министрĕ Алена Елизарова пĕлтернĕ тăрăх, улшăнусем Чăваш Енре пурăнакан 14,8 пине яхăн çынна пырса тивĕç. Компенсацин пысăклатнă виçи 1221 тенкĕпе танлашать. Ăна ялта ĕçлекен специалистсем 2021 çулхи утă уйăхĕн 1-мĕшĕнчен илме пуçлаççĕ.
Унсăр пуçне республикăри ачаллă граждансен патшалăх пособийĕсене те индексацилĕç, унăн виçи 2,91 процентпа танлашать. Пособипе уйăхсерен тÿлемелли укçа-тенкĕ компенсацине 2021 çулхи кăрлач уйăхĕн 1-мĕшĕнчен пуçласа индексацилеме плана кĕртнĕ.
Усрава илнĕ ачасен ашшĕ-амăшне тÿлемелли укçан виçине ÿстерме май паракан ĕç хутне те тишкернĕ ларăва пухăннисем. Документпа килĕшÿллĕн, усĕм 2,91 процент пулмалла. Çак пулăшупа 900 яхăн çынна тивĕçтереççĕ. Патшалăх тĕревне 2021 çулхи кăрлач уйăхĕн 1-мĕшĕнчен пуçласа тÿлеме тытăнĕç.
2021 çулхи кăрлачăн 1-мĕшĕнчен пуçласа пилĕк тата ытларах ачаллă çемьесенчи ачасем валли уйăхсерен паракан пособисене пысăклатнă виçепе тÿлеççĕ тата ашшĕ-амăшĕнчен пĕрне транспорт налукĕ тÿлес енĕпе çăмăллăх параççĕ.
ЧРПА пресс-служби.
Источник: "Наше слово" ( Мариинско-Посадская районная газета)