Публикации » Пахалăхлă та хăтлă çул пулĕ

Куславккаран Çĕнĕ Шупашкара каякан автомобилистсен çулĕ кĕскерех пуласси çинчен Чăваш Ен Пуçлăхĕ Олег Николаев Куславкка районĕн аталанавăне пĕтĕмлетнĕ тĕлпулура каланă. Çĕнĕ çулсем тăвасси – муниципалитетсен социаллă пурнăçĕпе экономикине аталантармалли программин тĕп тĕллевĕсенчен пĕри.

Программăпа килĕ-шÿллĕн, Нишер ялĕ витĕр асфальт хурса хăтлă çул тăвĕç. Ку вара Куславккапа Сĕнтĕрвăрри районĕсен хушшинчи «Атăл» çул лаптăкне пĕрлештерме май парĕ. «Кăткăс ыйтусене татса парасси халăхăн пурнăçне хăтлăрах тăвассипе çыхăннă. Кирлĕ йышăнусене пĕрле сÿтсе явса йышăнатпăр. Халăха мĕн кирлине шута илсе тĕллевсем лартмалла»,- тесе çирĕплетнĕ Олег Алексеевич.

Çул-йĕре юсама çывăх вăхăтрах пуçлĕç. Çавăн пекех Куславкка хулинчи Октябрь урамĕнчи çула та юсама йышăнса хăварнă тĕлпулура. Муниципалитетăн малалла утма вăй-хăват пурри çинчен те каланă.

О. ОЛИВАНОВА.