26 декабря 2020 г.
Çĕнĕ çул умĕн çуртсене илемлетесси йăлана кĕнĕ ĕнтĕ. Уйрăм çынсем те, организаципе предприяти сотрудникĕсем те кăмăла çĕклеме уяв темипе çыхăннă тĕрлĕ ÿкерчĕксем тăваççĕ, хутран касса чÿречесем çине эрешсем çыпăçтараççĕ. Çуртсен чÿречисем çине пăхма кăмăллă, мĕн кăна çук-ши унта! Юр пĕрчисем, Хĕл Мучипе Юрпике, тĕрлĕ чĕрчунсем...
Юлашки çулсенче «Сурхури шевлийĕ» конкурс иртет. Çавна май пирĕн хула çеç мар, ялсем те тĕрлĕ тĕспе çуталаççĕ. Çулсерен çĕнĕрен те çĕнĕ эскизсем шухăшласа кăлараççĕ. Сăмахран, Çичĕпÿртри Культура çурчĕн чÿречисем иртен-çÿренсем çине чăвашла «пăхаççĕ». Çĕнĕ çул уявне халалланă ÿкерчĕксене пĕтĕмпех чăвашла тунă. Республикăн çĕр çулхи уявĕ те йĕрленнĕ çав эрешсенче. Кунти культура ĕçченĕсен чуна çĕклекен. хавхалану çуратакан маттурлăхĕ ял халăхне савăнтарать.
Н. КОЛЕСНИКОВА.
Источник: "Наше слово" ( Мариинско-Посадская районная газета)