09 ноября 2020 г.
Кунсеренех çынсем хальхи йышши технологиллĕ хатĕрсемпе усă кураççĕ. Сăмахран, банк картти, кĕсье телефонĕ, компьютер. Кулленхи пурнăçра çĕнĕрен те çĕнĕ модельсемпе, программăсемпе тата сервиссемпе тĕл пулатпăр. Çавна май çынсене улталамалли тата вĕсен укçи-тенкине хапсăнмалли мелсен çĕнĕ тĕслĕхĕсем вăй илеççĕ.
Пирĕн республикăри виçĕ граждан пĕр талăкра ултавçăсене Интернет урлă 100 пин ытла укçа тенкĕ куçарса панă. Тĕслĕхрен, Шупашкарта пурăнакан 26 çулхи хĕрарăм мошенниксене 3500 тенкĕ «парнеленĕ». Вăрнар районĕнчи 28 çулхи гражданин наушник туянас тĕллевпе 9000 тенкĕ куçарнă, анчах та ĕмĕтленнĕ тавара вăл алăра тытса курайман. Çав кунхинех Етĕрне районĕнчи пĕр шкула палламан çын шăнкăравланă. Вăл хăйне правăна сыхлакан орган ĕçченĕ пек паллаштарнă, кĕçех тĕрĕслевпе çитессине пĕлтернĕ. Шухăшласа кăларнă тĕрлĕ мельсемпе усă курса вăл тĕрĕслекенсен тăкакĕсене маларах саплаштарма ыйтнă. Телефонпа калаçакана ĕненнĕ шкул директорĕ палламан счет номерĕ çине 12 пин тенкĕ укçа куçарнă, пысăк тăкак тÿснĕ. Кун пек чухне тимлĕхе çухатас марччĕ.
Хисеплĕ граждансем, хăвăрăн банка упрама хывнă укçăрпа та асăрхануллă пулăр! Пысăк тупăшлă тата иккĕленÿллĕ условиллĕ килĕшÿсем тума ан васкăр. Халиччен курман, палламан çынсенчен илтнĕ информацисене ан шанăр. СМС-па килекен пĕлтерÿсем çине ан хуравлăр. Уйрăмах банк картин тепĕр енче вырнаçнă CVV-код номерне тата парольне никама та калама кирлĕ мар.
Чăваш Республикин Шалти Ĕçсен пайĕ.
Источник: "Наше слово" ( Мариинско-Посадская районная газета)