Публикации » Чăваш тĕррин Кунĕ тĕлне ултă метрлă сурпан тĕрлеççĕ

Акци тупсăмĕ - Республикăри хуласемпе районсенчи тĕрĕ тĕрлекен ăстасен вăйĕпе сурпан йĕркелесси тата Чăваш Енри тĕрĕ тĕрлекенсен ăсталăхне чăваш тĕррин Кунне уявланă ятпа иртермелли савăнăçлă мероприятисенче чаплăн кăтартасси. Акци Чăваш Республикин халăхне пĕрлехи культура талккăшне пĕрлештерес, чăваш тĕррине халăх хушшинче йĕркелес тата çитĕнекен ăрăва йăлана кĕнĕ халăх искусствине тимлеме явăçтарас, çавăн пекех Республикăра кăçал пĕрремĕш хут ирттерекен Чăваш тĕррин Кунĕн уяв статусне ÿстерес тĕллевпе иртет. Аса илтеретпĕр, чăваш тĕррин сайра йышши культура еткерлĕхне упраса хăварас тĕллевпе Чăваш Республикин Пуçлăхĕн Олег Николаевăн указĕпе Чăваш тĕррин Кунĕ йĕркеленĕ. Уява кашни çулах чÿк уйăхĕн 26-мĕшĕнче ирттерме йышăннă.

Ĕçе хутшăнакансем Чăваш Республикинчи хуласемпе районсенчи тĕрĕ ăстисем пулĕç, шăпах вĕсен аллисем сурпана илемлетекен тĕрĕ тĕрлĕç. Республикăри кашни хулапа районтах акци шайĕнче сурпанăн икĕ кĕтесĕ валли вырăнти майпа тĕрĕ тĕрлĕç, «Паха тĕрĕ» тулли мар яваплă общество маçтăрĕсем вара «ПĔРЛЕ» логотиппа тата Чăваш Рес-публикин автономийĕн 100 çулне халалланă символикăпа сурпанăн икĕ вĕçне тĕрлĕç. Хатĕр сурпана хĕрлĕ каймапа çыпăçтарĕç. «Сурпан»ПĔРЛЕ» акцин хатĕр сурпанне чÿк уйăхĕн 26-мĕшĕнче чăваш тĕррин Кунне уявланă мероприятисенче кăтартмалла.

И. ПЕТРОВА.