05 октября 2020 г.
Юнкун пирĕн республикăна Раççей Правительствин Председателĕ Михаил Мишустин ĕçлĕ визитпа çитнĕ. Унпа пĕрле промышленноçпа суту-илÿ министрĕ Денис Мантуров тата финанс министрĕ Антон Силуанов пулнă. Правительствă делегацийĕ «Текстильмаш» предприятинче пир-авăр станокĕсем тунипе паллашнă. Михаил Мишустин каланă тăрăх, станоксем тăвакан предприятисен наукăпа тĕпчев тата конструктор ĕçĕсен, пилот проекчĕсен тăкакĕсене субсидилеме пултараççĕ.
Çавăн пекех премь-ер министр юпа уйăхĕнчех Раççейăн промышленноçпа суту-илÿ министерстви станоксем тăвакан промышленноçне аталантармалли стратегине правительствăна кĕртесси çинчен пĕлтерчĕ.
Ростех госкорпорацин «Технодинамика» холдингне кĕрекен В.И. Чапаев ячĕллĕ акционерлă обществинче М.Мишустин карапсем тăвакан предприятисем валли кăларакан резин техпластинисем тăвакан цехра пулса курнă, граждан продукцийĕн ассортименчĕпе паллашнă. Предприяти сотрудникĕсемпе продукцине сутасси çинчен калаçнă, ку енпе ытларах цифрă платформисемпе усă курмаллине палăртнă. Икĕ енлĕ ĕçлĕ тĕлпулура Михаил Мишустин Чăваш Ен ертуçине Олег Николаева иртнă суйлавра ĕнентерÿллĕ çĕнтернĕ ятпа саламланă, экономика аталанăвĕн тĕп тĕллевĕсене уçса пама ыйтнă.
«Республика атала-нăвĕн программинче пилĕк çул-йерпе 12 тĕп мероприяти пăхса хăварнă. Çав шутра предпринимательлĕх тата инвестици ĕç-хĕлне тытса памалли условисем туса парасси, комплекслă строительствăна социаллă ипотека программисем урлă пулăшу парасси. Çакăн пекех планра 8 технопарк тăвасси, вĕсенчен виççĕшĕ патшалăхăн, пиллĕкĕшĕ – уйрăм çынăн пулмалла. Çапла вара эпир Чăваш Енĕн çитес 5 çулсенчи сăнарне йĕркелеме пултартăмăр», - тенĕ Республика Пуçлăхĕ.
Çавăн пекех Олег Николаев Михаил Мишустинпа Çĕнĕ Шупашкарта социаллă пурнăçпа экономика хăвăрт аталанакан лапам туса хурассине тата республикăра юханшыв туризмне аталантарассине сÿтсе явнă.
И. АЛЕКСЕЕВА.
Источник: "Наше слово" ( Мариинско-Посадская районная газета)