11 сентября 2020 г.
Юнкун Правительство Çуртĕнче Чăваш Республикин Пуçлăхĕн тивĕçĕсене пурнăçлакан Олег Николаев «Раççей Федераци Правительстви пахалăхшăн паракан Преми»конкурсĕн эксперт пайташĕсемпе ĕçлĕ тĕлпулу ирттерчĕ.
Хăнасем республикăри травматологи, ортопеди тата эндопротезировани енĕпе ĕçлекен Федераллă центрĕн ĕçĕпе паллашрĕç.Палăртса хăварар, асăннă медицина учрежденийĕ пахалăх енчен хаклакан патшалăх премине илессишĕн тупăшать. «Раççей шайĕнчи ăмăртура иккĕмĕш хут тупăшатпăр. Куçăмлă экспертизăн иккĕмĕш тапхăрне çитни пирĕншĕн çав тери курăмлă.Экспертсен сĕнĕвĕсене шута илсе малалла тапăçма пултаратпăр»,- палăртрĕ медицина учрежденийĕн тĕп врачĕ Николай Николаев.
Экспертсем хаклав ирттернĕ тапхăрта учреждени тĕнче, раççей тата республикă аталанăвне хăйĕн тÿпине хывнине те шута илĕç. Тĕл пулăва хутшăннисем Федераллă центр чирлĕ çынсене çÿллĕ шайри технологисемпе медицина пулăшăвĕ панине палăртса хăварчĕç. Çавăн пекех медицина учрежденийĕ коронавирус чирĕпе чирлекенсене те тĕллевлĕ пулăшу панине çирĕплетрĕç.
Пахалăхшăн паракан премине тивĕç пулнисен ячĕсене çулталăк вĕçĕнче палăртса хăварĕç.
О. ОЛИВАНОВА.
Источник: "Наше слово" ( Мариинско-Посадская районная газета)