Публикации » Савăнăçлă та кĕтнĕ пулăм

Атăлçи ял хутлăхĕнчи Пущино ялне тахçантанпах кĕтнĕ çутçанталăк газĕ çитрĕ. Мероприятине «Газпром газораспределение Чебоксары» ОАО пуçлăхĕ Кияметдин Мифтахутдинов, строительствă, çурт-йĕр тата коммуналлă хуçалăхсен министрĕ Александр Героев, Сĕнтĕрвăрри район администрацин пуçлăхĕн тивĕçĕсене пурнăçлакан Владимир Мустаев, Çĕнĕ Шупашкарти «Газпром газораспределение Чебоксары» уйрăмĕн ертÿçи Сергей Ковшиков, Сĕнтĕрвăрринчи газ участокĕн ертÿçи Юрий Челеверов, Атăлçи ял тăрăхĕн пуçлăхĕ Анатолий Архипов хутшăнчĕç.

Кияметдин Мифтахутдинов ял-йыша тахçанах кĕтнĕ пулăм пурнăçланнă ятпа саламланă, çутçанталăк гаçне кĕртнĕ ĕçре хас-тарлăх кăтартнăшăн тав тунă. Кашни килтех çак ырлăхпа усă курма май тупмалла тесе палăртнă. Александр Героев хăйĕн калаçăвĕнче газ службин ĕçченĕсене уйрăммăн палăртса хăварнă. Газпа ăшăтмалли объектсен социаллă пĕлтерĕшне пысăк хакланă. Владимир Мустаев районти тепĕр виçĕ ялта газ кĕртес ыйту çивĕч тăнине пĕлтерчĕ. «Ял хутлăхĕн пуçлăхĕсемпе пĕрле ĕçлесе çак ыйтăва татса парассине шантарса калатăп. Ял халăхĕ те хастарлăх кăтартасса кĕтетĕп»,- пĕлтернĕ вăл.

Савăнăçлă лару-тăрура Сĕнтĕрвăрринчи газ участокĕн ертÿçине Юрий Челеверова район администрацийĕн Тав çырăвĕпе тивĕçтерчĕç.

Пущино ялĕнче пурăнакансен ячĕпе сумлă хăнасене ял старости Евгений Соловьев тав турĕ. Ял халăхĕн пĕрлĕхне, хастарлăхне те паллă туса хăварчĕ.Мероприятин пĕлтерĕшлĕ пайĕ факел çутнипе тата газ янипе вĕçленчĕ. Малалла пуçтарăннисене вырăнти пултарулăх ушкăнĕ илемлĕ юрă-кĕвĕпе савăнтарчĕ.

А. МАКСИМОВА.