31 августа 2020 г.
Чăваш Енри конкурентлă политикăпа тата тарифсемпе ĕçлекен патшалăх службин ертÿçи Надежда Колебанова Сĕнтĕрвăрри районĕнче пулчĕ.
Юнкун пирĕн района Чăваш Енри конкурентлă политикăпа тата тарифсемпе ĕçлекен патшалăх службин ертÿçи Надежда Колебанова ĕçлĕ визитпа килсе район администрациĕн пуçлăхĕн тивĕçĕсене пурнăçлакан Владимир Мустаевпа, администраци тĕрлĕ пайĕн ертÿçисемпе, ресурспа тивĕçтерекен организацисен представителĕсемпе тĕл пулчĕ. Тĕлпулу шайĕнче 2020-2025 çулсенче социаллă пурнăçпа экономика аталанăвĕн Комплекслă программин тĕп çул-йĕрне тишкерчĕç. Сÿтсе явнă ыйтусем хушшинче патшалăх тата муниципалитет нушисем валли таварсем, ĕçсем, пулăшу ĕçĕсем туянас сферăри контракт тытăмне пурнăçланине пула бюджет укçи-тенкин тухăçлăхне ÿстермелли калаçу малти вырăнта пулчĕ. Надежда Владимировна туяну процессне цифровизацилемелли çинче тĕплĕнрех чарăнса тăчĕ. Çак ĕç кирек хăш самантра та регион нушисене тивĕçтерме тата тухăçлăх мониторингне тума май пама пултарать, тесе пĕлтерчĕ Н.Колебанова. Çĕнĕлĕхсем авăн уйăхĕн 1-мĕшĕнчен вăя кĕреççĕ. Надежда Владимировна кăсăкланнă çынсене пурне те ку ĕçе май килнĕ таран хастарлăрах хутшăнма чĕнсе каларĕ.Тĕлпулăва хутшăннисем Сĕнтĕрвăрринчи Коновалово микрорайонĕнче вырнаçнă котельнăйне çитсе курчĕç, унăн ĕçĕ-хĕлĕпе паллашрĕç, тарифсене йĕркелемелли ыйтусене сÿтсе яврĕç.
И. АЛЕКСЕЕВА.
Источник: "Наше слово" ( Мариинско-Посадская районная газета)