17 августа 2020 г.
Çурла уйăхĕн 12-мĕшĕнче Чăваш Республикин Пуçлăхĕн тивĕçĕсене вăхăтлăх пурнăçлакан Олег Николаев общество шухăшне тĕпчессипе ĕçлекен Пĕтĕм Раççейри центрăн (ВЦИОМ) генеральнăй директорĕпе Валерий Федоровпа ĕçлĕ тĕлпулу ирттернĕ.
Çамрăксен пуçарăвĕсен центрĕнче ВЦИОМ ертÿçи республикăри студентсемпе уçă калаçу ирттернĕ. Валерий Федоров çавăн пекех çамрăк лидерсен конкурсĕнче çурма финала тухнисемпе тĕл пулнă. Палăртса хăваратпăр, асăннă конкурса Чăваш Республикин Пуçлăхĕн тивĕçĕсене вăхăтлăха пурнăçлакан Олег Николаев пуçарăвĕпе кăçал йĕркелесе янă. «Федераци шайĕнчи эксперт пирĕн тăрăха килни çав тери паха. Эпир те хамăр енчен çамрăксемпе тăтăшах тĕл пулса калаçма, вĕсен сĕнĕвĕсене тĕпе хурса кирлĕ пек мерăсем йышăнса хăварма тăрăшатпăр. Вĕсемпе пĕрле ĕçлесе усăллă мероприятисем йĕркелессишĕн те кулленех вăй хуратпăр», - тенĕ Олег Николаев хăйĕн сăмахĕнче. «Пирĕн проект тĕллевĕ – Раççейри мĕнпур çамрăка пĕр чăмăра пухса кирек-хăш регионта та пысăк çитĕнÿсем тума пулăшасси, пуласлăх патне ăнтăлма вĕрентесси», - тесе каланă Валерий Федоров. «Пурнăç шайне лайăхлатасси – палăртнă тĕллевсенчен чи кирли. Пурнăç лайăх пулсан çамрăксем хăйсемшĕн тăван регионтах тĕпленсе пурăнăç. Шупашкар питĕ илемлĕ хула, кунта пурăнакансем те лайăх çынсем, вĕсем пысăк тавра курăмлă, ăс-хакăл енчен те пуян. Малашлăх çине те тĕллевлĕн пăхаççĕ», - тесе пĕлтернĕ хăй шухăшне ВЦИОМ ертÿçи. Паянхи тĕлпулура çамрăксемпе социаллă çыхăнури условисене, социологи тĕлĕшĕнчи тĕпчев ĕçĕсене сÿтсе явма шухăш тытнине хыпарланă вăл сăмаха çавăрнă май.
И. АЛЕКСЕЕВА.
Источник: "Наше слово" ( Мариинско-Посадская районная газета)