10 августа 2020 г.
Уйăх каялла Чăваш Республикин Пуçлăхĕн тивĕçĕсене вăхăтлăх пурнăçлакан Олег Николаев Федерацин «Тĕп наукăпа методика ветеринари лабораторийĕн» патшалăх бюджет учрежденийĕн филиалне Шупашкарта уçассине хăвăртлатмалли çинчен каланăччĕ.
Ку йышши филиал республикăра кирли куç кĕрет. Çакна регионти предприяти-хуçалăх ĕçченĕсем те çирĕплетнĕ тĕл пулура, филиал çитес вăхăтра ĕçлесе каясса шанни пирки те каланăччĕ ун чух.
Чăваш Енре лаборатори таврашĕ çук мар. Анчах та хăш-пĕр тĕпчевсем ирттерме ытти регионсене кайма тивет: Хусана, Чулхулана, Самарăна.
Çĕнĕ филиалта пур енлĕн тĕпчевсем ирттерĕç. Чĕр-чунсен, кайăк-кĕшĕксен, пулăсен тата пыл хурчĕсен чирĕсене тĕпчеççĕ.Çĕр надзорĕпе çыхăннă ĕçре тăпрана тĕпчеттермесĕр пулмасть паллах. Халĕ ăна Чулхулана тата Самарăна тĕпчеве ямалла. Малашне вара филиал çак ĕçе пурнăçлама пробăсене Шупашкартах илме пултарнине пĕлтерет. Тĕрĕслевсем ял хуçалăх пĕлтерĕшлĕ çĕрпе тĕллевсĕр усă курнă тĕслĕх сахал мар тупса палăртаççĕ. Çĕр çинче хăйăр кăларас йĕркене пăхăнманни темиçе районта та пулчĕ юлашки çулсенче. Ытларах чухне рекультиваци проекчĕ çукки сăмахлаттарать. Ăна ăçта тумалли пирки те ыйту сиксе тухать. Çĕнĕ филиал ку енпе пулăшма пултарнине палăртас килет. Кунсăр пуçне çĕр пулăхлăхĕ пирки те пĕтĕмлетсе документсем хатĕрлеме пултараççĕ унта.
Апат-çимĕç продукцин пахалăхне ăçта тĕрĕслеттерме пулать-ши тесе нумайăшĕ кăсăкланаççĕ. Продукци эксперт пĕтĕмлетĕвĕпе килĕшсе тăнине те хаклать филиал.
Ытти ĕçсем пирки регионти Россельхознадзор управленине шăнкăравласа е сайтра вуласа пĕлме пулать. Хальлĕхе кунта пробăсене йышăнма темиçе пÿлĕм уйăрнă.
Н. ВАСИЛЬЕВА, Россельхознадзорăн Чăваш Республикинчи тата Ульяновск облаçĕнчи управленийĕн ĕçченĕ.
Источник: "Наше слово" ( Мариинско-Посадская районная газета)