10 августа 2020 г.
Çак кунсенче Чăваш кĕнеке издательствинче Георгий Фомиряков çырнă «Этно-Я-Futurum» альбом пичетленсе тухрĕ. Вăл хăйĕн ачалăхĕ, ÿнер искусствипе еплерех кăсăкланма пуçлани çинчен каласа парать,чăваш йăли-йĕрки çинче чарăнса тăрать, хăйĕн опычĕпе паллаштарать. Кĕнекен хăйне евĕрлĕ ятне акă мĕнлерех ăнлантарать автор. «Этно» – халăхпа тата унăн культурипе çыхăнни, «я» – эп ÿнерçĕ кунта тата çак самантра, "Futurum"– пуласлăхри пурнăçа витĕм кÿрекен ĕç-хĕл.
Альбома алла тытсассăн вуланăçемĕн вулас килет, сыпăк хыççăн сыпăк сисĕн-месĕр хыçа юлать. «Чăн малтанхине аса илсен», «Халăх чунĕ пирки», «Ÿнерçĕ е ÿнерçĕ вăййи», «Пурнăç юхăмĕнче» кăларăмсенче авторăн пултарулăх дневникĕнчи йĕркесене те илсе панă, вĕсем çав тери тарăн шухăшлă.
Чăваш Ен культурин аталанăвĕшĕн пысăк вăй хунăшăн кĕнеке авторне, кăларăм редакторне тата Чăваш кĕнеке издательствин тĕп редакторне Валерий Алексеева, альбомăн ăслăлăх редакторне, Чăваш наци конгресĕн хисеплĕ президентне Атнер Хузангая Чăваш автономи облаçне тунăранпа 100 çул çитнине халалланă медальпе чысланă.
Чăваш Республикин художникĕсен союзĕн ертÿçи Николай Андреев пултаруллă ăстан ĕçĕсенче тăван çĕршыва юратни тапса тăнине пĕлтерчĕ. Çавăн пекех Чăваш Республикин культура министрĕ Роза Лизакова, Чăваш кĕнеке издательствин тĕп директорĕ Светлана Каликова, филологи ăслăлăхĕсен кандидачĕ Атнер Хузангай тата ыттисем те мухтав сăмахĕсем калама пултарчĕç.
Георгий Фомиряков пурне те тав тунă май хăйĕн опычĕ çамрăксене кирлĕ пуласса шаннине пĕлтернĕ. «Ку кĕнекене эпĕ çамрăксене халаллатăп», — тенĕ вăл.
О. ИВАНОВА.
Источник: "Наше слово" ( Мариинско-Посадская районная газета)