Публикации » Ĕçлĕ тĕлпулу иртрĕ

Виçĕмкун Чăваш Республикин промышленноçпа энергетика министрĕн тивĕçĕсене пурнăçлакан Сергей Лекарев ĕçлĕ визитпа Сĕнтĕрвăрри районĕнче пулчĕ.

Тĕлпулу шайĕнче Сергей Лекарев республикăри предприятисене патшалăх пулăшăвĕпе витĕмлĕ тивĕçтерни çинчен пĕлтерчĕ, вак тата вăтам предпринимательлĕхе аталантарма ятарлă программăсем ĕçленине палăртрĕ. Унсăр пуçне Чăваш Республикин социаллă пурнăçĕпе экономика аталанăвĕн 2020-2025 çулсем валли хатĕрленĕ Комплекслă программипе паллаштарчĕ, унта промышленноçа аталантарасси çине пысăк тимлĕх уйăрнине палăртрĕ.

Район администрацийĕн пуçлăхĕн тивĕçĕсене пурнăçлакан Владимир Мустаевпа пĕрле Сергей Лекарев «Марпосадкабель» предприятин ĕçĕ-хĕлĕпе паллашрĕ. «Марпосадкабель» АО 1987 çулта Шупашкарти «Чăвашкабель» завочĕн филиалĕ пек уçăлнă. Кабель-проводниксем кăларасси предприятин тĕп ĕçĕ пулса тăрать. Паянхи куна продукцин 50 ытла паллă шутланать. Предприяти 2016 çултан пуçласа 2019 çулччен «огнестойкие силовые кабели» маркăллă продукци кăларнă. Ку ĕç çĕнĕ комплекслă инвестици проектне пурнăçлама май панă, продукции калăпăшне виçĕ хут ÿстернĕ.Çавăн пекех 100 ытла пысăк тухăçлă ĕç вырăнĕ йĕркелеме май панă.

Малашлăха палăртса хунă предприяти европăри производствăсен оборудованине тĕпе хурса çĕнĕ йышши кабельсем туса кăларас енĕпе инвестици проектне пурнăçлама майсем туса парасси çинчен ыйту кăларса тăратрĕ.

Çивĕч ыйтусен хушшинче пысăк ăсталăхлă кадрсем çитменни, туса кăларакан продукцине сарас енĕпе курăмлăрах ĕçлемелли пулчĕç.

Малалла ĕçлĕ тĕлпулура хутшăнакансем районти «Инноваци» НПО ĕçĕ-хĕлĕпе паллашрĕç. Унăн ертÿçи Владислав Степанов çитес çул кунта йывăç комбинатне уçма палăртни çинчен пĕлтерчĕ. «Предприяти ĕçне малалла аталантарас енĕпе шухăшсем нумай, вĕсене пурнăçлама республиуçкăра йышăннă Комплекслă аталану прграмминче палăртса хăварнă тĕллевсем пулăшасса шанатпăр. Çĕнĕ предприяти валли пĕрремĕш оборудовани кĕркунне илсе килетпĕр. Шутласа хунисе пурнăçа кĕрсе пырасса шанатпăр»,- пĕлтерчĕ Владислав Васильевич.

О. СЛАВИНА.