20 июля 2020 г.
Чăваш Республикинчи Сĕнтĕрвăрри районĕнче пурăнакансен хăтлăх шайне ÿстерес тĕллевпе хула администрацийĕ ятарлă муниципаллă программа хатĕрленĕ. Унпа килĕшÿллĕн, хулари ача-пăча паркĕ хăтлăхпа тивĕçтермелли объектсен шутне кĕрет. Пĕрлĕхлĕ усă курмалли лаптăка тирпей-илем кĕртес тĕллевпе Сĕнтĕрвăрри районĕнчи хула хутлăхĕ парк территорине тĕпрен юсаса çĕнĕ сăн кĕртме явапланнă.
Районăн пĕрлештернĕ муниципаллă бюджечĕн калăпăшне çирĕплетнĕ тапхăрта юсав ĕçĕсем ирттерме укçа-тенкĕ пăхса хăварнă. «Хальхи хула тавралăхне йĕркелесси» муниципаллă программа тĕллевĕсем 2018 – 2024 çулсем хушшинче пурнăçа кĕмелле.
Парка хăтлăх кĕртес ĕçĕн пĕрремĕш тапхăрĕнче 11 612,5 пин тенкĕ тăкакланă. Лапамра çуллахи сцена, шашка-шахмат выляма кăмăллакансем валли хÿшĕ хатĕрлесе çитернĕ. Палăртса хăварар, хÿшĕре спортпа туслă, сывлăха тимлĕх уйăракансем тăтăшах пуçтарăнса шахмăтла выляс енĕпе турнирсем иртереççĕ.
Шел пулин те, лапамри тепĕр хатĕр объектăн сăпатне район çыннисем хăйсене кирлĕ пек улăштарчĕç. Сăмах «Я люблю Марпосад» стела çинчен пулнине тÿрех ăнлантăр пулĕ, халь унта «ларпосад» тени мĕскĕннĕн курăнса тăрать.
Парка юсас енĕпе иккĕмĕш тапхăр валли уйăрнă 7 547,5 пин тенкĕпе мĕнле ĕçсем пыраççĕ-ши. Çак ыйту районти кашни çынна кăсăклантарать тесе шутлатпăр. Паянхи куна паркра спорт хусканăвĕ-сем тумалли лапама хытă сий сарнă, футболла вылямалли хапхасем лартса çирĕплетнĕ. Эпир ĕç-пуç епле пынипе кăсăкланнă вăхăтра Владимир Александров подрядчик спорт хусканăвĕсем тумалли ятарлă оборудованине лапама илсе çитерчĕ. Спорт хатĕрĕсене çитес вăхăтра вырнаçтарса лартас пирки пире Владимир Николаевич çирĕплетсе каларĕ.
Çамрăксем тĕрлĕ хусканусем туса, аслăраххисем пĕр-пĕринпе тĕл пулса турнирсем ирттерсе, ача-пăча выляса-кулса çак парка янăравлă саспала тултарасса чăтăмсăр кĕтетпĕр. Муниципаллă программăн тĕллевĕсем туллин пурнăçа кĕрессе шанса тăратпăр.
О. ЕФРЕМОВА.
Источник: "Наше слово" ( Мариинско-Посадская районная газета)