06 июля 2020 г.
Чăваш кĕнеке издательствинче кĕçĕн çулхи ачасем валли чылай кăларăм кун çути курать. Вĕсен йышĕнче сăвă-калав кĕнекисем те, юмах пуххисем те пур. Çак кунсенче ача-пăча литературин çÿлĕкĕ тепĕр кăларăмпа пуянланчĕ — маттур чăваш ачисем валли Марина Карягинăн «Чĕвĕлти чĕкеç чĕппи» кĕнеки пичетленсе тухрĕ. Палăртса хăвармалла, кĕнеке ал çырăвĕ ачасемпе çамрăксем валли чăвашла çырнă произведенисен 2019 çулхи конкурсĕнче çĕнтернĕ.
«Чĕвĕлти чĕкеç чĕппи» — ыттисенчен урăхларах кĕнеке, унти сăвăсем пурте пĕр сас паллинчен пуçланакан сăмахсенчен тăраççĕ. Ку ĕнте пирĕн чĕлхе çав тери пуяннине палăртать», — тет автор «Манăн ытарайми пĕчĕк тусăм!» пайра. Кĕнекене пурĕ çирĕм тăватă сăвă кĕнĕ, кашниех пĕр сас паллинчен пуçланать терĕмĕр. «Чимĕр-ха, пирĕн алфавитра вăтăр çичĕ сас паллиçке!» — тесе шухăшласа илтĕр ахăртнех. Ăнланманлăх сиксе тухасран Марина Федоровна çакăн сăлтавне те ăнлантарса парать. Ъ, ь — сассăр паллăсем, сăмах варринче те вĕçĕнче кăна тăраяççĕ. Чăваш чĕлхинче б, г, д, ж, з, р, ф, ц, щ хупă тата ă, о уçă сасăсем вырăс чĕлхинчен кĕнĕ сăмахсен пуçламăшĕнче çеç тĕл пулаççĕ.
Вулакансене тĕслĕх те илсе парас килет:
Сăвăсем хыççăн ыйтусем пур. Вĕсем ачасене шухăшлама хистеççĕ, хайлава лайăхрах ăнланма пулăшаççĕ. Сăмахран, «Хĕрĕх хурпа хуралçи» сăвă хыççăн çакнашкал ыйту панă, «Хăна хурĕ килĕнче мар пулин те мĕне пула хĕрĕх хурăн хуралçи пулса тăма пултарнăши?».
«Вырăсла та пĕлетпĕр, ют çĕршыв чĕлхисене те вĕренетпĕр. Тăван чĕлхене хисеплесе çитĕнекен ача тăван çĕршыва ытларах юратать, ваттисене сума сăвать. Аслисен пилне тивĕç пулса ÿс, манăн пĕчĕк тусăм. Санра — шанчăк! Пысăк пул!» — тет Марина Федоровна кĕнеке тусĕсене. Пĕчĕк вулакансем унăн сăмахĕсене ăша хывсан тем пекехчĕ!
О. ИВАНОВА.
Источник: "Наше слово" ( Мариинско-Посадская районная газета)