06 июля 2020 г.
Ытлари кун Чăваш Республикин обществăлла палатинче регион пуçлăхне суйланакан кандидатсен тĕлпулăвĕ иртрĕ. Вĕсем суйлав вăхăтĕнчи кĕрешÿ йĕрки пирки калаçса татăлчĕç.
Кандидатсен калаçăвне Чăваш Республикин обществăлла палати йĕркелерĕ. Мероприятие уçнă чухне унăн представителĕ Сергей Смастюк кăçалхи суйлав умĕн конкуренци уйрăмах пысăк пулнине асăрхарĕ, çавăнпа та кампани вăхăтĕнчи конкурентлă кĕрешÿ хăйĕн тасалăхĕ-пе тата евĕклĕхĕпе пулас кампанисемшĕн тĕслĕх пултăр тесе кандидатсене «Çыран хĕрринче» калаçса татăлма ыйтрĕ. «Ан манăр! Суйлав иртнĕ хыççăн пурин те пĕр регионта пурăнмалла»,-пĕлтерчĕ вăл.
Ун хыççăн сăмах Чăваш Республикин Тĕп суйлав комиссийĕн ертÿçи Александр Цветков илчĕ. Вăл кандидатсем пĕр-пĕрне хисеплесе суйлав кампанийĕ вăхăтĕнче обществă лартнă чикĕ урлă каçманнине шаннине пĕлтерчĕ.
Тĕп суйлав комиссийĕ вара суйлав вăхăтĕнче кашни кандидата валли пĕр йышши, танă условисем туса парас тата суйлав процедурине максималлă «уçă» ирттерес кăмăла тепĕр хут палăртрĕ.
Чăваш Енри муниципаллă йĕркелÿсен Канашĕн председателĕ Станислав Николаев Чăваш Енри кашни хулапа районта кандидатсене хăйсен программипе паллаштарма май паракан лапамсем тумалли сĕнÿ тăратнă пирки пĕлтерчĕ. Çавăн пекех вĕсемпе «муниципаллă фильтр» урлă каçма кирлĕ алă пуснисене пуçтарнă чухне усă курма пулать.
Çакăн хыççăн кандидатсем хăйсем сăмах илчĕç. Чи малтан пухăннисем умне Чăваш Републикин Пуçлăхĕн тивĕçĕсене пурнăçласа пыракан Олег Николаев илчĕ. «Республика ертÿçин должнăçне суйланакан хăйĕн çине пысăк явап илет . Чи малтан унăн хăйĕн политика культури пысăк шайра пулнине кăтартмалла. Суйлава хутшăнакансем пĕр-пĕрин хушшинче калаçса татăлма пултараççĕ, паллах çакна кăтартмалла та: уçă, тĕплĕ, калаçу ирттермелле, калани суйлав умĕн панă пушă сăмах кăна пулмалла мар. Дискуссисесене курăмлă ирттерме сĕнетĕп, проблемăсене татса парасси çинче тĕплĕн чарăнар. Евĕклĕх стандарчĕсене пăхăнма сăмах паратăп. Кандидатсене пĕр-пĕрне хисеплеме ыйтатăп, çакăнпа эпир хамăра суйлакан обществăна хисепленине те кăтартăпăр»,-вĕçлерĕ хăйĕн сăмахне Олег Николаев.
Юрий Шакеев вара ытларах республика проблемисем çинче чарăнчĕ, хăйне стротельствă, медицина, халăх пурăнма урăх регионсене куçса кайни тата ытти проблемăсем пăшăрхантарни çинчен каларĕ.
Ытти кандидатсем вара палăртнă кампани условийĕсене хаваспах йышăннине пĕлтерчĕç. «Пĕр-пĕрне итлеме пĕлсен эпир суйлакансем патне хамăрăн программăсен ырлăхĕсене çитерме пултаратпăр. Пĕрле çивĕч тăракан проблемăсене татса пама тăрăшатпăр», -терĕ Александр Андреев кандидат. Çаплах вăл Тĕп суйлав комиссине тав турĕ, Олег Николаевпа пĕрле ĕçлеме хатĕррине пĕлтерчĕ.
Тĕлпулу вĕçленнĕ хыççăн та кандидатсем пĕр-пĕринпе калаçма пăрахмарĕç, урамра та унăн çиппине малалла тăсрĕç.
И. ДЕРЮЖИН.
Источник: "Наше слово" ( Мариинско-Посадская районная газета)