29 июня 2020 г.
Çĕртме уйăхĕн 24-мĕшĕнче Чăваш Енре Республика кунне анлăн паллă турĕç. Ытларах мероприятисене çĕршыври лару-тăрусене тĕпе хурса видео-çыхăну мелĕпе йĕркеленĕ. Чи пĕлтерĕшлĕ пулăмсенчен пĕри – Экономикăн Аслă канашĕн ларăвĕ. Унта ертÿçĕсем республикăн çитес пиллĕк çул валли пăхса хăварнă анлă программăна сÿтсе явнă.
Мероприятине Чăваш Республикин Пуçлăхĕн тивĕçĕсене вăхăтлăх пурнăçлакан Олег Николаев, Раççей Федерацийĕн Федераци Канашĕн Председателĕн Пĕрремĕш çумĕ Николай Федоров, Раççей Федерацийĕн Федераци Пухăвĕн Патшалăх Думин депутачĕ Анатолий Аксаков, республикăри предприятисемпе организацисен ертÿçисем хутшăннă. Видео-çыхăну мелĕпе йĕркеленĕ ларăва Раççей Федерацийĕн промышленноçпа суту-илÿ Министрĕ Алексей Беспрозванных, «Корпорация «МСП» АО генеральнăй директорĕ–правлени председателĕ Александр Браверман, «Фонд развития моногородов» коммерциллĕ мар организацийĕн генеральнăй директорĕ Ирина Макиева тата ытти сумлă хăнасем пуçтарăннă.
Анатолий Аксаков хăйĕн сăмахĕнче пысăк программăна хатĕрлес ĕç виçĕ уйăхлăха тăсăлнине хыпарланă. Вăл ĕç хутне йĕркелеме чи ăста та пысăк тавракурăмлă экспертсем, федераци тата регион шайĕнче хисепе тивĕçнисем хутшăннă тенĕ. Предпринимательлĕх тытăмĕнче вăй хуракансем, ĕç тăвакан влаç органĕсенче тăрăшакансем, обществăлла организацисенче тимлекенсем хастар пулчĕç.
Программăра региона аталантарассипе тĕп çул-йĕрсене палăртнă йывăрлăх кăларса тăратнă пайсене те сÿтсе явнă. Пĕр сăмахпа каласан, çитес çул валли пысăк тĕллевсем пăхса хăварнă. Программăра пурĕ 1338 проект тĕп вырăн йышăнаççĕ. Паллă, вĕсенчен ытларах пайĕ социаллă сферăпа çыхăннă. Регионти çулсене тирпейлесси те тĕп ыйтусенчен пĕри шутланать. Инфратытăма вăй илтересси те кун йĕркинче çивĕч тăрать. Игорь Меламед хăйĕн сăмахĕнче проектсене пурнăçа кĕртсен, регион чылай ÿсĕмсемпе палăрасси куçкĕретех тенĕ. Социаллă сферăпа экономика аталанăвĕнчи йывăрлăх кăларса тăратакан ыйтусене тĕпрен татса пама витĕм кÿрессине асăннă, Чăваш Республикин экономикине хăватлантармалли пайсем – промышленноç тытăмĕ, ял хуçалăхпа информаци технологийĕсен пайĕ, туризм, строительство тата ытти те.
Раççей Федерацийĕн Федераци Канашĕн Председателĕн Пĕрремĕш çумĕ Николай Федоров çĕнĕ программа Чăваш Респуб-ликине çĕнĕ ÿсĕмсем тума пулăшасса каланă. Экономикăн Аслă канашĕн ларăвне пĕтĕмлетнĕ май,Чăваш Республикин Пуçлăхĕн тивĕçĕсене вăхăтлăх пурнăçлакан Олег Николаев программа çав тери кăсăклă, пысăк пĕлтерĕшлĕ пулнине, ăна пĕр уйăх хушшинче тишкерсе, муниципалитетсенчен килнĕ сĕнÿсене шута илсе çирĕплетсе хăвармалла тесе палăртнă.
ЧРПА пресс-служби.
Источник: "Наше слово" ( Мариинско-Посадская районная газета)