29 июня 2020 г.
Кĕçнерникун ытти çĕршывпа пĕр танах пирĕн районта Раççей Федерацин Конституцине улшăнусем кĕртессине палăртмалли сасăлав участокĕсем уçăлчĕç.
Вĕсем утă уйăхĕн 1-мĕшĕччен ĕçлĕç. Çак вăхăтра 18 е ытларах çулхи Раççей Федераци гражданĕсем хăйсене регистрациленĕ участокра ирхине 8 сехетрен пуçласа каçхи 20 сехетчен сасăлама пултарĕç.
Сасăлав пĕрремĕш кунĕнче эпир 1-мĕш номерлĕ гимназинче вырнаçнă 1107-мĕш сасăлав участокне çитрĕмĕр. Вырăнти суйлав участокĕн председателĕн çумĕ Алена Тимофеева халăх иртенпех йышлăн хутшăннине палăртрĕ.
Çынсем пĕччен кăна мар, мăшăрĕсемпе е пĕчĕк ачисемпе пычĕç. Участока кĕнĕ-кĕменех вĕсене ятарлă шлемсем тăхăннă комисси пайташĕсем кĕтсе илчĕç. Кашни суйлакана маскă, перчетке тата ручкă пачĕç. Вĕсем пĕр-пĕринчен 1,5 метр тăршшĕнче лараççĕ. Йышăннă нормăна кунта уйрăмах хытă пăхăнаççĕ.
Палăртнă процедурăсем витĕр тухсан кăна граждăнсем паспорт кăтартса алла бюллетень илме пултарчĕç. Унпа паллашнă хыççăн вĕсем ятарлă кабинана кĕрсе хăйсен сассине палăртрĕç, вĕçĕмсĕр хаклă документа пысăках мар ещĕке ячĕç. Вăхăт иртнĕçемĕн вара çын тата ытларах килме пуçларĕ. Ещĕксем хăвăртрах та хăвăртрах тулчĕç. Ĕç малалла пырать.
И. ЭТМЕНЬ.
Источник: "Наше слово" ( Мариинско-Посадская районная газета)