29 июня 2020 г.
Чăваш Республикин тивĕçĕсене вăхăтлăх пурнăçлакан Олег Николаев нумаях пулмасть «Вести.«Интервью» кăларăмра Чăваш автономийĕн çĕрçуллăхĕ кашни çыншăн мĕнпе пĕлтерĕшлĕ пулнине уçса пачĕ.
«Ман шутпа, ку пулăм кашни çыншăн кăсăклă та паллă. 100 çул хушшинче тĕрлĕ улшăнусем пулса иртрĕç. Сухапуç тытнинчен пуçласа космоса вĕçсе çитнĕ теççĕ чăваш халăхĕ çинчен. Хама илсен, 4-5 çулсенче асанне йывăç лартнă ĕçе хутшăнтаратчĕ. Ултă çулта чухне сухапуç тытнă. Асатте «хама валли улăштаракан тупрăм» тесе савăннă»,- пуçларĕ калаçăва Олег Алексеевич. Çавăн пекех вăл Правительствă ĕçĕнчи тĕп тĕллевсене палăртса хăварчĕ. Республикăн экономикине вăхăтпа тан аталантарасси, чăваш чĕлхипе халăх культурине упраса хăварса çĕнĕ аталану никĕсне хывасси çинчен калаçрĕ регион ертÿçи. «Тăван чĕлхе пурăнсан,асаттесен вăйĕпе хамăрăн тăрăшуллăха пĕрлештерсе ăна мăнаçланма пулăшсан – рес-публика çирĕпрех пулĕ. Чăвашла калаçасси «модăна» кĕтĕр»,- чĕнсе каларĕ вăл.
«Чĕрĕ чĕлхе» проект пуçаруçи пулнă май, тăван чĕлхепе кĕнекесем, хаçат-журналсем ытларах пичетлемелле: урамсене, чарăну вырăнĕсене чăваш тĕррипе илемлетмелле терĕ республика ертÿçи. Чăваш çырулăхĕн никĕсне малалла та тĕпчес тĕллевлĕ пулнине те палăртса хăварчĕ вăл.
Нумай чĕлхеллĕ халăхсен хушшинчи çыхăнăва çирĕплетсе пырас шухăшпа видеосаламсем йышăнассине йĕркелени çинчен палăртрĕ Олег Алексеевич. Тĕрлĕ çĕршывсенчен, регионсенчен чуна пырса тивекен саламсем килнине Францинчен çитнĕ саламлă çырупа çирĕплетрĕ вăл. «Чăвашăн мĕн ĕмĕртенпех ниме пухса йывăрлăхсене пĕрле татса парасси йăлара пулнă. Яланах пĕрле пулсан, пĕрне-пĕри хавхалантарса ĕçлесе пырсан пысăк çитĕнÿсем тума пулать»,- вĕçлерĕ хăйĕн сăмахĕсене ертÿçĕ.
О. ЕФРЕМОВА.
Источник: "Наше слово" ( Мариинско-Посадская районная газета)