22 июня 2020 г.
Тунтикунсерен иртекен канашлура Чăваш Республикин Пуçлăхĕн тивĕçĕсене вăхăтлăх пурнăçлакан Олег Николаев республикăри муниципалитетсене 100-шер пин тенкĕ уйăрса парасси тата республика Пуçлăхĕн тивĕçĕсене пурнăçлас кăмăл тунă кандитатсем валли суйлав тапхăрĕнче халăхпа тĕлпулусем ирттермелли вырăнсем йĕркелемелли пирки калаçрĕ.
Палăртса хăварар, Чăваш автономийĕ 100 çул тултарнине халалласа Олег Николаев кашни яла тата хулана хăтлăх кĕртес тĕллевпе укçа-тенкĕ уйăрса парассине пĕлтерчĕ. 100 пин тенкĕне муниципалитетсем хăйсене кирлĕ пек усă курма пултараççĕ. Ачасене вылямалли лапамсем йĕркелеме, палăк лартма е тирпей-илем кĕртес ĕçе пурнăçламалли кирек епле енĕпе те усă курма май пур асăннă укçа-тенкĕпе. «Чăваш автономийĕ 100 çул тултарнине ĕмĕрлĕхе асăмра хăварас тĕллевпе уйăратпăр асăннă укçана. Республика бюджетĕнчен ку ĕçе пурнăçлама 300 млн. тенкĕ уйăрĕç, утă уйăхĕн пĕрремĕш çурринче муниципалитетсене укçа -тенкĕпе тивĕçтерĕç»,- пĕлтерчĕ регион ертÿçи.
Çавăн пекех Олег Алексеевич Чăваш Республикин Пуçлăхĕн тивĕçĕсене пурнăçлама кăмăл тунă кандидачĕсен халăхпа тĕл пулмалли вырăнсене муниципалитетсем хăйсем палăртса хăвараççĕ тесе пĕлтерчĕ.Суйлав тапхăрĕнче кандидатсем хăйсен программисемпе паллаштарма, халăхпа куçа-куçăн курса калаçма пултарччĕр тесе йĕркелеççĕ ку ĕç-пуçа.
ЧРПА пресс-служби.
Источник: "Наше слово" ( Мариинско-Посадская районная газета)