11 июня 2020 г.
Иртнĕ эрнере Турханкассинчи ял вулавăшне кăмăллакан Варвара Яичниковăн «Мультфильм сăнарĕсен пластилин тĕнчи» куравĕ уçăлчĕ. Пушă вăхăтра вăл çапла майпа çĕнĕ тĕнчесем шухăшласа кăларать.
Курава 48 «Союзмультфильм» студи сăнарне тăратнă. Сăмахран, çĕртме уйăхĕн 10-мĕшĕнче паллă студи хăйĕн çуралнă кунне уявлать. Пурĕ вара Варвара 100 ытла героя пластилинран калăпланă.
Студи кăларнă мультфильмсем хушшинче автор ыттисенчен ытларах «Простоквашино» сăнарĕсене кăмăллать. Çавăнпа та кунта вăл чунтан юратнă Матроскинпа Шарика та курма пулать.
Ĕçсенчен чылайăшĕ кăшăл вирусĕпе çыхăннă йывăр лару-тăру вĕçленсен авторпа пĕрле тĕрлĕ конкурссене хутшăнĕç.
Варварăна ăнăçу сунатпăр, вăл малашне те пирĕн пата килсе çÿрекенсене савăнтарасса шанатпăр, пултаруллă хĕр чи пысăк ĕмĕчĕсене пурнăçланине кĕтетпĕр.
Куравпа тĕплĕнрех пирĕн вулакансем карантин вĕçленнĕ хыççăн паллашма пултарĕç.
Н. КРАСНОВА.
Источник: "Наше слово" ( Мариинско-Посадская районная газета)