11 июня 2020 г.
Ку эрнере Шупашкарта Пĕтĕм Раççейри ача-пăча наукăпа практика конференцийĕн заочлă регионсем хушшинчи «Тĕнче пирĕн алăра» ятлă тапхăрĕ иртрĕ. Ăна кăçал Раççейре иртекен Астăвăмпа мăнаçлăх çулне, Тăван çĕршывăн Аслă вăрçинче çĕнтернĕренпе 75 çул çитнине тата Раççей Федерацин чрезвычайлă лару-тăру министерствине йĕркеленĕренпе 30 çул çитнине халалланă.
Конкурса Оренбург, Пенза Саратов, Чулхула, Самар, Киров, Свердловск облаçĕсен тата Пушкăртстан, Тутарстан, Чăваш, Марий Эл Республикисенчен 81 ĕç тăратнă.
Атăлçи тата Урал федераллă округĕсенчи Пĕтĕм Раççейри пушар хуралĕн обществин тĕп канашĕн полномочиллĕ представителĕ Светлана Сергеева ертсе пыракан эксперт комиссийĕ кашни ĕçе тĕплĕн пăхса тухрĕ, вĕсене тĕпчев тата наукăпа практика пĕлтерĕшĕн енчен хакларĕ, Конкурсантсем ĕçсене тĕплĕнрех пурнăçлама тăрăшнă, çавăнпа та вĕсене хаклама чылай вăхăт кирлĕ пулчĕ. Анчах та комисси хăйĕн ĕçне аван пĕлсе кăтартнине палăртмалла.
Çĕнтерÿçĕсем хушшинче пирĕн ентешсемпе пĕр танах Челябинск, Свердловск, Пенза, Чулхула облаçĕсен тата Марий Элпа Тутарстан Республикисенчи конкурсантсем пулчĕç.
Хамăр районти çĕнтерÿçĕсемпе призерсене уйрăммăн палăртса хăварас килет. Сĕнтĕрвăрринчи пĕтĕмĕшле пĕлÿ паракан шкулта вĕренекен Алексей Мартьянов «Тава тивĕçлĕ ĕçченсемпе пушар хуралĕн ветеранĕсем, ВДПО» секцири «Салтак, сăвăç, пушар сÿнтерекен» номинацире пĕрремĕш вырăн йышăнчĕ, 1–мĕш номерлĕ гимназире вĕренекен Владлена Никитина «Информаципе-пропаганда ĕçĕ» секцири «Пушар сÿнтерекенĕн шкула ачисем хушшинче ирттернĕ пропаганда пĕлтерĕшĕ» номинацире 2-мĕш вырăна тивĕçлĕ пулчĕ.
Çĕнтерÿçĕсемпе призерсене саламлатпăр, вĕсене малашне те пысăк çитĕнÿсем тума сунатпăр.
И. СЕРГЕЕВ.
Источник: "Наше слово" ( Мариинско-Посадская районная газета)