07 ноября 2009 г.
Çапла ятпа пирĕн районти Шĕнерпуç ялĕнче пурăнакан сăвăçăн Ольга Шĕнерпин черетлĕ кĕнеки Шупашкарти «Çĕнĕ вăхăт» издательствăра калăпланса тухрĕ. ¤на истори наукисен докторĕ Г. И. Тафаев профессор рецензиленĕ.
«Çĕн самана – тĕрлĕ шăпа» поэма пурнăçран илнĕ фактсемпе пулăмсем çинче никĕсленсе тăрать. Унăн тĕп сăнарĕ те – Сергей Кормильцев – поэтессăн аслашшĕ. Вăл йывăр саманара пурăннă, çапах та пуçа усман, утан çул çинчи тумхахсене пăхмасăр малалла талпăннă, çутталла туртăннă. Чухăн чăваш çем-йинче çуралнă каччă малтан патша çарĕнче хăюлăхпа тата ăспа палăрать, каярахпа Мускавра бухгалтер ĕçне вырнаçать, карьера картлашки тăрăх çÿлелле хăпарать. 1917 çулхи Октябрь революцине, большевиксем влаçа ярса илнине Сергей хапăлласа йышăнмасть. Яла таврăнсан кунта пурăнакансене çапла калать, «Пурнăçа «юсакансем» – ĕнерхи çаракутсем – Микулана сирпĕтесшĕн, Çĕпĕре те çитересшĕн». Каярахпа Совет влаçĕ яла та çитет. Кам ырми-канми ĕçлесе тата тар юхтарса ыттисенчен лайăхрах пурăннă, çавсене Çĕпĕре ăсатаççĕ. Ырă мар шăпа Сергей ашшĕне те кĕтет. ¤на çитĕнтернĕ тыррине влаç представительне паманшăн арестлеççĕ, пĕтĕм пурлăхне илсе тухса каяççĕ. Сергейăн ашшĕ те, пиччĕшĕ те тифпа чирлесе вилеççĕ. Çапла вара каччăн пĕччен юлнă амăшĕ патне яла таврăнма лекет, каярахпа вăл, колхоз тусан, бухгалтер ĕçне кÿлĕнет.
Поэтесса поэма сюжетне вулакана тыткăнламалла аталантарса тунă. Кĕнекене, поэмăсăр пуçне, сăвăсен ярăмне те кĕртнĕ. Ольга Шĕнерпи вĕсенче, философи мелĕпе анлă усă курса, пурнăç, кăмăл-сипет, çынсен хутшăнăвĕсем, туйăмĕсем çинчен шухăшлать, пĕтĕмлетÿсем тăвать. Кăларăм поэтессăн çемье архивĕнчен илнĕ ÿкерчĕксемпе пуян.
И. Левин.
Источник: "Наше слово" ( Мариинско-Посадская районная газета)