07 ноября 2009 г.
Иртнĕ канмалли кунсенче çанталăк сасартăк сивĕтни, тавралăх шурă юрпа витĕнни чылайăшĕшĕн кĕтменлĕх пулчĕ. Уйрăмах çул çÿрекенсемпе автомобилистсен умне, çавăн пекех çул-йĕре тасатса, тĕрĕслесе тăракансен умне чылай йывăрлăхсемпе пăтăрмахсем кăларса тăратрĕ вăл.
Паллах, сивĕ хĕл кунĕсем кĕçех çитессе пурте пĕлнĕ-ха, анчах ăна паян-ыранах кĕтмен темелле. Çавăнпа та районти хăшпĕр службăсем , тĕслĕхрен, çул-йĕре юртан тасатса, пăрлакран сапса тăракан организацисем çак кĕтменлĕхре çухалсах кайнă тейĕн. Ахальтен мар ĕнтĕ тунтикун каçхине Чăваш телевиденийĕн çĕнĕ хыпарсен вырăсла кăларăмĕнче Сĕнтĕрвăрри районĕнчи çулсене кирлĕ пек тасатса тăманни, ку тĕлĕшпе хĕле хатĕрленменни пирки критикленĕ.
– Кам çак передачăна курнă, унта каллех республикăри тепĕр икĕ-виçĕ районпа пĕрле эпир япăххисен шутне лекнĕ. Мĕн, пирĕн çулсене юртан тасатакан яваплă организацисем çук-и. Мĕн сăлтава пула çапла ÿрĕк-сÿрĕк йĕркеленĕ çак ĕçе. – çапларах ыйтусемпе пуçларĕ иртнĕ ытларикун район администрацийĕн пуçлăхĕ А. Дмитриев уйăхсерен пĕрре иртекен анлă канашлăва. Ку хутĕнче те унта хула, ял поселенийĕсен пуçлăхĕсене, район территорийĕнче вырнаçнă тĕрлĕрен организацисемпе учрежденисен, предприятисен ертÿçисене, район администрацийĕн пай пуçлăхĕсемпе специалисчĕсене пуçтарнă.
Александр Иванович чи малтан çулсене тасатас ыйту пирки канашлăва пухăннисене ăнлантарса пама хăйĕн çумне А. Спиридонова ура çине тăратрĕ, район территорийĕнчи çулсем çинче паянхи кун хăш организацинчен мĕн чухлĕ техника ĕçлени пирки конкретлă ăнлантарса пама ыйтрĕ. Ку ыйтупах районти чрезвычайлă лару-тăру тата гражданла оборона енĕпе ĕçлекен пай пуçлăхĕ Н. Борисов та тухса калаçрĕ. Вăл çул çинче пулса тăнă лару-тăру ырă енне улшăннине, палăртнă çитменлĕхсене пĕтерес тĕллевпе ĕçленине палăртрĕ. Çакна Николай Николаевич çулсене тĕрĕслес тĕллевпе хăй ирхи рейд ирттернипе те çыхăнтарса çирĕплетрĕ. Анчах пуринчен те хытă ыйтма хăнăхнă Александр Ивановича çак хуравсем питех çырлахтармарĕç курăнать. Вăл çул-йĕре вăхăтра тата кирлĕ пек тасатса тăрас ыйту патне темиçе хут та таврăнчĕ, çакăншăн яваплă çынсенчен малашне те çирĕп ыйтасси пирки каланă май район ертÿçи çак кунсенче Урхас Кушкă тăрăхĕнче пулса иртнĕ пăтăрмах пирки сăмах пуçарчĕ. Кунти шкул директорĕ ăшăтмалли шыв пăрăхĕсене 8 (!) витре шыв çитмен пирки вырăнти ача садне ăшă пама чарнă. Садике çÿрекен пĕчĕк пепкесем шăнса чирлесрен те шикленмен-ши директор.
– Олег Иванович, мĕнле майпа Сирĕн ял территоринче çакăн пек пăтăрмах сиксе тухма пултарнă. Сире вырăнти халăх ял поселени пуçлăхне шанса суйланă, çавăнпа та Эсир хăвăр территоринче пулса иртекен ĕçсемшĕн яваплă. Шкул директорĕ садике ăшă пама пăрахасси çинчен Сирĕнпе канашланă-и. – ыйтрĕ район ертÿçи О. Леонтьевран. Лешĕ вара, çак ыйтăва кĕтменскер, çухалсах кайрĕ темелле, нимĕнле конкретлă хурав та параймарĕ.
– Яваплăха туйманни, ĕç çине ÿрĕк-сÿрĕк пăхни – акă мĕн чăрмантарать хăшпĕр ертÿçĕсене. Хĕл вара кашнинченех хытă ыйтать, явапсăрлăха каçармасть. Çакна манас марччĕ пирĕн, – хыттăнах чĕнсе каларĕ Александр Иванович анлă канашлăва пухăннисене. – Районта мĕн чухлĕ ытларах ĕçлетĕп, тĕлĕнмелли те ытларах та ытларах тупăнса пырать, – тесе хушса хучĕ вăл юлашкинчен. Анчах хĕлпе çыхăннă ыйту кунпах вĕçленмерĕ, вăл тата та нумай калаçтарчĕ канашлура. Шĕнерпуç шкулĕпе Культура керменне çутçанталăк газĕ кĕртесси, халлĕхе «кăвак çулăм» ырлăхĕпе усă курман хăшпĕр учрежденисемпе предприятисем валли кирлĕ чухлĕ çĕр кăмрăкĕ турттарса килесси, хула мунчине йĕркене кĕртесси тата нумай-нумай ыйту тавра калаçрĕç анлă канашлăва пухăннисем.
Хула, ял поселени пуçлăхĕсем пĕрин хыççăн тепри хăйсен территорийĕсенчи лару-тăрупа паллаштарчĕç, çывăх вăхăтра татса памалли ыйтусем тавра калаçрĕç.
Районти халăха ĕçпе тивĕçтерес енĕпе ĕçлекен Центр пуçлăхĕ Н. Семенов ĕçсĕррисене пулăшма уйăрса панă укçа-тенкĕпе мĕнлерех усă курни çинчен каласа кăтартрĕ. Район администрацийĕн финанс пайĕн пуçлăхĕ Г. Изосимова, çутĕç пайĕн пуçлăхĕ Л. Смирнова, ялхуçалăх пайĕн пуçлăхĕ В. Васильев хăйсен «отраслĕсем» енĕпе çыхăннă проблемăсем тавра калаçрĕç. Раççей Федерацийĕн Чăваш Республикинчи районсем хушшинче йĕркеленĕ налук службин Кÿкеçри 5-мĕш номерлĕ инспекцийĕн пуçлăхĕ А. Кузнецов налук ыйтăвĕсене хускатрĕ.
Çавăн пекех район активĕн анлă канашлăвĕнче район пурнăçĕпе çыхăннă тата ытти чылай актуаллă ыйтусене пăхса тухрĕç, малашлăх планĕсене палăртрĕç.
C. Кулигина.
Источник: "Наше слово" ( Мариинско-Посадская районная газета)