13 декабря 2008 г.
Паллах, пурте çăмăллăхсене укçапа улăштарнипе килĕшесшĕн мар, уйрăмах транспортпа çÿрекенсем. Çавна шута илсе ЧР правительстви 2009-2011 çулсенче çул çÿремелли (проездной) билетсене пăрахăçламасть. Тата ветерансене паракан саплаштару (компенсаци) хисепĕ те 270 тенкĕрен 345 тенкĕ таран пысăкланать. Çак çăмăллăхпа усă куракан çынсен шутне вăрçă тата ĕç ветеранĕсем, тылра ĕçленисем, политика репрессийĕнчен хур курнисем кĕреççĕ. Çул çÿремелли билет хакĕ вара 350 тенкĕпе танлашĕ (хальлĕхе 250 тенкĕ).
Студентсемпе шкул ачисен те çул çÿремелли билетсем хаклăланаççĕ (380 тата 330 тенкĕ). Анчах та çак хисепрен 180 тенкине бюджетран каялла тавăрса параççĕ. Чăннипе вара билет хакĕ студентсемшĕн 200 тенкĕ, шкул ачисемшĕн 150 тенкĕ пулать. Ку, малтанхи билет хакĕсемпе танлаштарсан, студентсемшĕн 5 тенкĕ, шкул ачисемшĕн 20 тенкĕ йÿнĕрех.
Мĕнпе çыхăннă-ха çакăн пек кăткăс "саплаштару" системине пурнăçа кĕртни. ЧР правительстви транспорт предприятийĕсене тухăçлă ĕçлеме майсем туса парасшăн.
Тата çакна палăртса хăвармалла. Çул çÿремелли билетпа пĕр йышши транспортпа кăна çÿреме пулать. Сăмахран, автобус валли илнĕ билет троллейбуспа çÿреме май памасть. Малтан ун пек пулман. Çак пăтăрмах транспорт парк-не харпăрлăха куçарнипе çыхăннă.
В. Малеев çăмăллăхсемпе çыхăннă ытти улшăнусем çинчен те каласа пачĕ. Кун çинчен эсир тĕплĕнрех хаçатăн çитес вырăсла кăларăмĕнче вуласа пĕлме пултаратăр.
И. ВАСИЛЬЕВ.
Источник: "Наше слово" ( Мариинско-Посадская районная газета)