Публикации » Асран тухмĕ хăрушă самант

1961 çулта пушарта вилнĕ çынсене асăнма Шупашкар тата Сĕнтĕрвăрри хулисенчен 30 çын ытла çитрĕç. Вĕсен хушшинче РФ Чăваш Республикин ГУ МЧСĕн пресс-служба начальникĕ О. Нягинапа начальникĕн пĕрремĕш çумĕ А. Махов, пропаганда ушкăнĕн начальникĕ Д. Моисеевпа пропаганда ушкăнĕн инспекторĕ В. Ильин, «Тантăш», «Хыпар» хаçатсен, çавăн пекех «Россия»ТК, Чăваш радио представителĕсем, Сĕнтĕрвăрри район пуçлăхĕн тивĕçĕсене пурнăçлакан А. Мясников, районти ача-пăча творчество шкулĕн ĕçченĕсем М. Волков, И. Соловьева, 34 " ПЧ начальникĕ П. Молодовпа унăн çумĕ А. Сапожников, райадминистрацин граждăнла оборона тата чрезвычайлă лару-тăру пайĕн ертÿçи Н. Борисов тата пушарта шар курнисемпе вилнисен тăванĕсем пулчĕç.

Хурлăхлă митинга Хуракасси шкул директорĕ В. Белова уçрĕ. Килнĕ хăнасем пурте çулăмран асăрханмаллине палăртрĕç. Г. Иванова, хăй те çак пушартан çăлăннăскер, ун чухне мĕн курнине аса илсе каласа пачĕ.

Пуçтарăннă çынсем «Стрижи» палăк патне чечексем тата кăшăлсем хучĕç.

Сăмах май каласан Хуракасси шкулĕнче чÿк уйăхĕн пуçламăшĕнче вут-кăвара хирĕç кĕрешес тема тăрăх 5–7 тата 8–11 классенче викторина иртрĕ. Кунта Н. Гаврилова (10 кл.), А. Пыркова (4 кл.) тата А. Павлова (6 кл.) уйрăмах палăрчĕç. Кĕçĕн класра вĕренекенсем вут-кăвара хирĕç ÿкерчĕкпе плакатсен выставкине хутшăнчĕç. Н. Лукина ертсе пынипе 7 «а» класс литература монтажне, И. Трофимова ертсе пынипе 11 класс музыка композицийĕне хатĕрлерĕç.

С. ВАСИЛЬЕВА.