Публикации » Улах ларни

Тепĕр кун килти ĕçсене пурнăçласа пĕтерсен çамрăк хĕр-упраç каç пуласса чăтăмсăррăн кĕтнĕ, мĕншĕн тесен вăл улахра савнă тусне курма пултарнă-çке, кун каçипе каччисем те хĕрĕсемшĕн тунсăхласа çитнĕ.

Пикесем пуçтарăнсанах алă ĕçне тытăннă, пĕрисем çăм арланă, теприсем нуски-алсиш çыхнă, виççĕмĕшсем тĕрĕ тĕрленĕ... Ĕçленĕ май вĕсем хăйсем çинчен каласа панă, кам-кама килĕштернине, вăрттăнлăхсене уçса панă, чун каниччен пĕр-пĕринпе сăмахланă. Николай Иванович каланă тăрăх, каччăсем каярахпа пурте пĕрле пухăнса хĕрсем пуçтарăннă çурта ку-пăспа «çĕмĕрттерсе» кĕнĕ. Пуçланнă вара кунта юрă-ташă каçĕ... Улахра каччăсем хĕрсене пур енчен те сăнанă, ĕçлеме, савăнма пĕлнине, çынсем хушшинче хăйне мĕнле тытнине. Улах хыççăн савнă хĕрĕсене каччисем килĕсене ăсатнă.

Юрă-ташă каçĕ тенĕрен, çук-çке халĕ малтанхи пек улах ларни. Шел, асатте-асанне йăлисем манăçа тухаççĕ çав, те хамăр улшăнатпăр, те пурнăçĕ улăштарать пире. Халĕ, ав, çамрăксем каç пулсан «дискотекăна» тухса чупаççĕ те эрех-сăрапа пуçĕсене минретеççĕ. Ку та ĕнтĕ хăйне евĕр улах пулĕ те, çапах та ĕлĕк кун пек япаласемпе иртĕхмен-çке. Аслисем те сыпкалама юратаççĕ çав. Вĕсен çамрăк çынсемшĕн ырă тĕслĕх пулмалла та-ха...

И. АНАТОЛЬЕВА.