«Восток» СХПКн Сĕнтĕрпуç бригади иртнинче хатĕрлев енĕпе Турханкассинчи ĕçтешĕ-сенчен самай юлса пыни куçкĕретчĕ. Хальхинче кунти инженери службин комисси пуçлăхне кăтартмалли, савăнтармалли, пулмарĕ мар, сеялкăсен ураписене шуратнă, плугсен «çĕççисене» те тутăхасран топливо каяшĕпе сĕрнĕ. Ку бригадăри «Енисей» комбайн вара хĕл каçма А. Г. Николаев ячĕллĕ ОООн гаражне куçнă.
Çула май тенĕн асăннă хуçалăхăн Турханкасси бригадине те кĕрсе тухма тÿр килчĕ. Кунта йĕркелĕх пуласси пĕртте иккĕлентермесчĕ пулин те иртнĕ тĕрĕслев вăхăтĕнчипе танлаштарсан хальхинче бригадăра ăмсанмалла типтерлĕх хуçаланатчĕ. Комбайнсене те, ытти ялхуçалăх машинисене те ĕçлекенсем ятарлă ГОСТăн мĕнпур требованийĕсене шута илсе пурнăçланă темелле. Чăн та, кунашкал йĕркелĕх çине республика комиссине илсе килсе кăтартсан та намăс курмалла пулмĕ.
Шел пулин те, «Рассвет» ОООна эрне хушшинче лайăх çанталăкра мĕнпур ялхуçалăх техникине хĕллене кирлĕ пек хатĕрлеме пурпĕр вăхăт çитмен. Сеялкăсене тасатса лартнипех çырлахнă кунта. Вырăнти специалист ăнлантарнă тăрăх, ĕçсен ытти пайĕ каярах пурнăçланмалла. Хăçан. Татса каламах йывăр. Çук, хуравне пачĕç-ха кунта, çуса тасатнă хыççăн ялхуçалăх машинисене типме вăхăт кирлĕ-мĕн. Мĕнех, эпир те кĕтĕпĕр. Асăннă хуçалăхăн комбайнĕсем те хĕллехи тапхăра йĕркеллĕ кĕтсе илессе пит шанас килет.
«Звезда» СХПКн техника паркĕ те хальхинче тулли савăнтарупах кĕтсе илмерĕ. Иртнипе танлаштарсан, кунта сеялкăсем кăна постамент çине куçнă. Шел, хуракассисенни пек тасалса мар. Çавах та кунта, аса илтерер, пĕртен-пĕр комбайна тивĕçлĕ тимлĕх уйăрнă.
Палăртма кăмăллă, А. Г. Николаев ячĕллĕ ООО иртнĕ тĕрĕслев вăхăтĕнчи асăрхаттарусене шута илнĕ, çитменлĕхсене пĕтерме тăрăшнă.
И. ПАВЛОВА.