Публикации » Ватăсене асăнатпăр

Мĕшĕл тăрăхĕнче çак куна «ватти пани» теççĕ. Çулталăкра икĕ хутчен (çуркунне тата кĕркунне) ваттисене асăнмалли уйрăм кунсем пур. Çак кун чиркĕве кайса вилнисен ячĕсене хут çине çырса пачăшкăна кĕлĕ вулама панă, асăнтарнă çĕре кăнихвет-пĕремĕк илнĕ.

Кĕр мăнтăрĕпе выльăх пусса(автан, сурăх е пăру, сысна ашĕпе асăнма юраман) шÿрпе е кăмакара шаркку, кукăль пĕçернĕ, çăмарта хăпартни хатĕрленĕ, икерчĕ ăшаланă. Тĕп килтен тухса кайнă ачи-пăчисем пурте хăйсен çемйисемпе ашшĕ-амăшĕ патне пуçтарăннă. Кĕрекере пуçтарăнса сĕтел çинчи пур апата та ас тивсе пăхмалла пулнă, вилнисем тутă çÿреччĕр тенĕ. Ларсанах Тур кĕтесĕ умне çурта çутнă, вĕсен шучĕ мăшăрсăр пулмалла пулнă. Юрласа-ташласа ларман, шăкăл-шăкăл калаçса çĕре кĕнĕ тăванĕсене аса илнĕ, хăшĕ-пĕри макăрнă та. †лĕкрех сĕтел çинчен апат-çимĕç илсе урама та тухса лартнă тет. Халĕ кун пек пулăм сайра-хутра çеç тĕл пулать. Пуçтарăннă çынсем апатлансан сĕтеле пуçтарман, çĕр каçипех çапла лартса хăварнă, килти кушаксене вара çĕрĕпех урамран кĕртмен. Хăшĕ-пĕрисем килте асăннă хыççăн тăванĕсем е кÿршисем патне те кайнă.

Хальхи вăхăтра та çак йăласене пăхăнса «автан авăтман» яла куçнă çынсене асăнаççĕ.

И. ФЕДОРОВА.