09 августа 2008 г.
Ыран пысăк уяв – строительсем хăйсен професси кунне паллă тăваççĕ. Чăваш Республикин тава тивĕçлĕ строителĕ, Раççей Федерацин хисеплĕ строителĕ ячĕсене тивĕçнĕ Алексей Александрович Шумов 17 çул каялла йĕркелесе янă тулли мар яваплă «Маяк» общество пирĕн районта чăннипех те чи сумлă строительство организацийĕсенчен пĕри шутланать. Асăннă коллектива виççĕмĕш çул ĕнтĕ, мăшăрĕ пекех, Г. Шумова ăнăçлă ертсе пырать. Галина Миновна, малтан темиçе çул директор заместителĕнче ĕçлесе пуян опыт пухнăскер, экономика тата строительство енĕпе икĕ аслă пĕлÿ илнĕскер, производствăна хальхи самана ыйтăвĕсемпе килĕшÿллĕн аталантарас тĕлĕшпе ырми-канми тăрăшать. Ертÿçĕ тавра пултаруллă та умри яваплăха туйса ĕçлекен çынсем пĕр коллектива чăмăртанни те çитĕнÿ хыççăн çитĕнÿ тума май парать. Акă, «Маяк» предприяти 2007-мĕш çул кăтартăвĕсем тăрăх республикăри строительствăпа çул-йĕр организацийĕсен ăмăртăвĕнче виççĕмĕш вырăн йышăннă.
Источник: "Наше слово" ( Мариинско-Посадская районная газета)
Первоисточник: http://www.smi21.ru/?mode=publication&path=date,publication&publication=218768&p_date=09.08.2008&date=09.08.2008