00:00 24 сентября 2011 г.
Октябрьски ял хутлăхне кĕрекен Истереккасси ялĕнчи магазин çурчĕ кивелсе кайнă пирки ун вырăнне çĕнни лартас текен шухăш Октябрьски райпо Совечĕн председательне Р. Почемова тахçанах канăç паман. Ял халăхĕ те çĕнĕ магазин тăвасса тахçанах кĕтет. Иртнĕ эрне пуçламăшĕнче вара истереккассисемшĕн кĕтнĕ самант çитнĕ тесен те йăнăш пулас çук. Кивĕ магазин çуртне "ниме" мелĕпе пур ял çынни те хутшăнса салатнă. Ĕçе хăвăртлатас тата çăмăллатас тесе Октябрьски райповĕ хăйĕн техникине уйăрнă. Кунсăр пуçне Октябрьски ял хутлăхĕн пуçлăхĕ С. Назаров тата В. Мартьянов вырăнти депутат ĕçе йĕркеленĕ çĕре активлă хутшăннă.
Паянхи кун тĕлне пулас çĕнĕ магазин никĕсне хывнă та ĕнтĕ. Çак кунсенчех строительство ĕçне пуçăнмалла.
Магазин хăпартнă вăхăтра ял халăхĕ валли кунта ĕçлекен А. Сергеева сутуçă çурчĕ умне райпо киоск илсе килсе лартнă. Халĕ ĕнтĕ ку тăрăхра пурăнакансем çĕнĕ, илемлĕ те хăтлă магазин уçăласса чăтăмсăррăн кĕтеççĕ.
К. ТИХОНОВА.