30 апреля 2021 г.
Иртнĕ юнкун Пĕтĕм Раççейри «Хĕрлĕ Хĕрес» обществăлла организацийĕн Чăваш Республикинчи уйрăмĕн сывлăх пункчĕ пирĕн хулара уçăлчĕ. Ăна Раççейри Хĕрлĕ Хĕрес 154 çул тултарнине халалланă. Пункт Николаев урамĕнчи 54а çуртра вырнаçнă.
Мероприятие Новинскинчи вырăс халăх хорĕ илем кÿчĕ. Пухăннисем умĕнче район пуçлăхĕ Владимир Петров, район администрацийĕн пуçлăхĕн тивĕçĕсене пурнăçлакан Сергей Прохоров, хула хутлăхĕн администрацийĕн пуçлăхĕ Вячеслав Сыройкин, хăнасем тухса калаçрĕç. Сывлăх пунктне уçнин тĕллевĕ - аслă ăрури çынсене медицинăпа социаллă пулăшу парасси.
Хĕрлĕ хăю касса çурта кĕнĕ хыççăн пĕчĕк экскурси ирттерчĕç. Тивĕçлĕ канури çын е инвалид гражданин сывлăх пункчĕн пулăшăвĕпе усă курма пултарать.
Кунта сывлăха çирĕплетмелли тĕрлĕ процедурăсем, юристпа психолог консультацийĕ, гуманитари пулăшăвĕ илме май пулĕ.
А. МАКСИМОВА.
Источник: "Наше слово" ( Мариинско-Посадская районная газета)