23 декабря 2019 г.
Нумаях пулмасть Кайри Шĕнерпуçĕнчи Культура çуртĕнче Театр çулталăкне пысăк мероприятипе вĕçлерĕç. Халăх спектакльсем курчĕ. Ялти куракансене савăнтарма Тăвай районĕнчи Енĕш Нăрвашри Культура çурчĕ çумĕнчи халăх театрĕ те çитрĕ. Вĕсем Николай Айзман çырнă «Шикли шикленнĕ, кĕрĕк пĕркеннĕ» пĕр актлă комеди лартса пачĕç.
Халăх театрĕн ертÿçи З. Васильева ушкăн артисчĕсемпе Енĕш Нăрвашра çуралса ÿснĕ Вера Кузьминична Кузьмина артистка çинчен каласа пачĕ, куракансемпе пĕрле шÿтлĕ инсценировка ирттерчĕ.
Уяв вĕçленнĕ хыççăн ял старости Ю. Андреев ушкăна çĕнĕ çитĕнÿсем тума сунчĕ, куракансен ятĕнчен тав турĕ. Енĕшнăрвашсем те кивçенре юлас темерĕç, Кайри Шĕнерпуçсене хăйсем патне хăнана чĕнчĕç. Малашне икĕ ушкăн тачăрах çыхăнса ĕçлеме сăмах пачĕ.
Каярах Культура çуртĕнче «Çулсем пирĕншĕн чăрмав мар» кружок пайташĕсем ларăва пуçтарăнчĕç. Вĕсем сцена çинче пулса иртнине тĕрлĕ енлĕн сÿтсе яврĕç, спектакльсем лартас умĕн ытларах ĕçлесе вĕсенче тарăнтарах та пĕлтерĕшлĕрех темăсем хускатмаллине палăртса хăварчĕç.
Э. НИКОЛАЕВА.
Источник: "Наше слово" ( Мариинско-Посадская районная газета)