18 февраля 2019 г.
Иртнĕ ытларикун район администрацийĕн ĕçченĕсем Чăваш Республикин Пенси фончĕн представителĕсемпе тĕлпулу ирттерчĕç. Района килнĕ делегацире Чăваш Республикинчи Пенси фончĕн пайĕн управляющийĕн çумĕ И.Коннова тата пенси укçипе тивĕçтерекен пай пуçлăхĕн çумĕ И. Ефимова, Пенси фончĕн районти пайĕн пуçлăхĕ М. Маренина пулчĕç. Кун йĕркинче тăракан ыйтусем хушшинче пенси законодательствине улшăнусем кĕртесси тата Амăшĕн капиталĕпе усă курмалли йĕркери улшăнусене пăхса тухасси пулчĕ. Пенси фончĕн ĕçченĕсем тивĕçлĕ канăва çĕнĕ йĕркепе тухмаллине аса илтерчĕç, балсен системине, пенсие тухма хатĕрленекенĕн статусне анлăн уçса пачĕç. Пĕлтĕр Амăшĕн капиталне тỹлес йĕркене те улшăнусем кĕртнĕ. Вĕсенчен чи пысăкки - капитала çулталăк çурă çитмен ачасем валли уйăрса паракан тỹлев сумми çине хывма май пурри. Кунта пĕр услови пур, ачана 2018 çулхи чỹк уйăхĕн 1-мĕшĕччен çуратни е палăртнă кунччен усрав çемьене кĕртни кирлĕ.
А. МАКСИМОВА.
Источник: "Наше слово" ( Мариинско-Посадская районная газета)