11 февраля 2019 г.
Юнкун Карапаш ял хутлăхĕн администрацийĕнче депутатсен районти Пухăвĕн депутачĕ Радим Почемов çынсене йышăнчĕ. Тĕлпулăва çырăннисем чылай пулчĕç. Пынисене ытларах çак ыйтусем кăсăклантарчĕç: çỹп-çапа пухса тиесе тухасси, ялсене тирпей-илем кĕртесси, çутăпа тата шывпа тивĕçтересси. Халăхран пуçтаракан сĕт хакĕ вара яланхиллех çивĕч ыйтусен шутĕнче пулчĕ. Кашни çыннах Радим Вячеславович тимлĕ итлерĕ, вĕсем хускатнă ыйтусене тĕплĕн пăхса тухрĕ, май килнĕ таран хурав пама тăрăшрĕ. Хăшĕсене вырăнтах татса пама май пулчĕ. Депутат шухăшĕпе, çакнашкал тĕлпулусем ирттерни халăх хуйхи-суйхине вăхăтра асăрхама, вĕсене хумхантаракан ыйтусене, проблемăсене татса парас çул-йĕре çийĕнчех палăртма май парать.
М. ЖАНДАРОВА.
Источник: "Наше слово" ( Мариинско-Посадская районная газета)