03 марта 2012 г.
Нарăс уйăхĕн вĕçĕнче Шĕнерпуç шкулне таврари ял халăхĕ питех те йышлă пуçтарăнчĕ. Чи малтанах ял çыннисем район администрацийĕн пуçлăхĕпе Ю. Моисеевпа, ЧР Патшалăх Канашĕн депутачĕпе А. Разумовпа, республикăра çĕрулми çитĕнтерессипе палăрнă «Слава картофелю» хуçалăх ертÿçипе А. Капитоновпа, Чечня вăрçине хутшăннă В. Борисов генерал-майорпа, Раççей Геройĕпе, авиаци генерал-майорĕпе Н. Гавриловпа тата ыттисемпе те тĕл пулса калаçрĕç, тĕрлĕ ыйтусем сÿтсе яврĕç. В. Борисовпа Н. Гавриловăн пурнăç çулĕ, çапăçу саманчĕсем çинчен хатĕрленĕ презентацисемпе, районăн ĕçĕ-хĕлĕпе паллашрĕç. Ял çыннисем хăнасене хăйсене канăçсăрлантаракан ыйтусем пачĕç, вĕсем çине хуравсем илчĕç. Тĕслĕхрен, вĕсене Сĕнтĕрвăрри хулинче нумаях пулмасть уçăлнă, 30 тĕрлĕ пулăшу ĕçĕсем паракан Центр (многофункциональный Центр государственных и муниципальных услуг) кăсăклантарчĕ. Ялти Культура çурчĕн шăпи те пăшăрхантармасăр иртмерĕ.
Çакăн хыççăн сцена çинче Шупашкартан килнĕ «Асамат» чăваш эстрада ушкăнĕ концертпа савăнтарчĕ. Ку ушкăнăн концерчĕ Çĕнĕ Шупашкар хули çумĕнчи лаша спорчĕн шкулĕн директорĕн В.Красновăн парни пулчĕ. Артистсем хăйсен пултарулăхĕпе туллин савăнтарнисĕр пуçне залра ларакансемпе пĕрле «Тус-тăван юрри», «Çуралнă кун ячĕпе» юрăсене чунтан шăрантарчĕç.
Тăвăллăн алă çупса, тав туса уйрăлчĕç ял çыннисем артистсемпе. Çакнашкал ыр туйăмлă концерт нумайлăха юлĕ вĕсен асĕнче.
Н. ПЕТРОВА.
Чураш ялĕ.
Источник: "Наше слово" ( Мариинско-Посадская районная газета)