17 декабря 2011 г.
Чÿк уйăхĕн вĕçĕнче Шĕнерпуçĕнчи шкулта чăваш халăх поэчĕ Я. Ухсай çуралнăранпа 100 çул çитнине халалласа «Ухсай Яккăвĕ – талантлă сăвăç» ятлă литературăпа музыка композицийĕ иртрĕ.
Хитре илемлетнĕ залра пухăннисем поэтăн портречĕпе кĕнекисен выставкине тата «Ухсай – чăваш халăхĕн чапĕпе мухтавĕ» презентацие курса савăнчĕç.
Чи малтан чăваш чĕлхипе литературине вĕрентекен Н. Петрова Ухсай Яккăвĕн ачалăхĕпе паллаштарчĕ. Çавăн пекех вăл К. Иванов поэтăмăрпа виççĕмĕш сыпăкри тăван пулни çинчен пĕлтерчĕ, К. Ивановăн «Нарспи» поэмипе Я. Ухсайăн «Кĕлпук мучи» поэминче пĕрпеклĕхсем нумаййине тĕслĕхсемпе çирĕплетрĕ.
Литература каçне 8-мĕш класра вĕренекен Л. Витальева, А. Соколов пултаруллă ертсе пычĕç.
Сăвă калакансем хушшинче 9 класра вĕренекен Д. Архипов, 8-мĕш класри Н. Новиков, А . Шемарина, К. Петрова, 7-мĕш класри И. Романова палăрчĕç. Ачасем 6-мĕш класра вĕренекен А. Вишневскин «Асамат кĕперĕ» юррине тăвăллăн алă çупса йышăнчĕç. Даша, Катя, Ксюша Петровăсенчен тăракан хĕрсен ушкăнĕ чăваш ташши ташласа савăнтарчĕ.
Н. АРКАДЬЕВА.
Источник: "Наше слово" ( Мариинско-Посадская районная газета)